Emin Əmrullayev: Sertifikasiyadan keçə bilməyən 1657 müəllim işdən çıxarılıb

Elm və Təhsil naziri Emin Əmrullayev xarici dil müəllimləri ilə bağlı sertifikatlaşdırma nəticələrini açıqlayıb. Nazir bildirib ki, bu prosesdə iştirak edən müəllimlərin yalnız 12 faizi uğur qazanıb.

 Sertifikasiyadan keçə bilməyən 1657 müəllimin əmək müqaviləsinə xitam verilib. Onların əksəriyyəti uzun illərdir tədrislə məşğul idi.

Nazirin sözlərinə görə, bu müəllimlər 80 minə yaxın şagirdə xarici dil fənnini tədris edirdilər. Bu da onların tədris keyfiyyətinin nə qədər vacib olduğunu ortaya qoyur.

 Astara rayonu üzrə vəziyyət xüsusilə diqqətçəkicidir. Burada fəaliyyət göstərən hər 3 xarici dil müəllimindən biri sertifikasiyadan keçə bilmədiyi üçün işdən azad edilib.

 "Bu nəticələr təhsildə keyfiyyətin yüksəldilməsi məqsədilə atılan addımların zəruriliyini göstərir", – deyə nazir bildirib.

Birxeber.az olaraq məsələni diqqətdə saxlayırıq və növbəti mərhələdə əvəzləyici müəllimlərin təyinatı ilə bağlı məlumatları da işıqlandıracağıq.