Yardımlıda dövlətin çəkdiyi su pulla satılır – Yolocaq və Vərov kəndləri susuz qalıb

Yardımlı, 28 iyul (Birxeber.az) – Yardımlı rayonunun Yolocaq və Vərov kəndlərində içməli su böhranı yaşanır. Sakinlər bildirirlər ki, dövlət tərəfindən çəkilmiş su xətləri mövcud olsa da, kəndlərə faktiki olaraq su verilmir. Bu səbəbdən əhali içməli suyu yalnız pulla – maşınla almağa məcbur qalır.

Məlumatlara görə, bir maşın içməli suyun qiyməti 120 manata qədər yüksəlib. Sakinlər vəziyyətdən narazıdır və problemin arxasında 3 nömrəli Regional Sukanal İdarəsinin tərkibində fəaliyyət göstərən Yardımlı Sukanal Sahəsinin dayandığını iddia edirlər.

“Su boruları kəndə qədər çəkilib, ancaq kranlardan su gəlmir. Deyirlər istəyirsinizsə, maşınla gətirək – o da 120 manat. Əkinimiz quruyur, camaat susuzluqdan əziyyət çəkir. Bu necə ədalətdir?” – deyə Yolocaq kənd sakini Birxeber.az-a açıqlamasında bildirib.

Yardımlı rayon İcra hakimiyyətinin nəzarət edə bilmədiyi və ya birləşib əhaliyə divan tutan qurum insanları alçaldır. 

Məsələ ilə bağlı Azərsu ASC-nin 3 nömrəli Regional Sukanal İdarəsinin Yardımlı Sukanal Sahəsi ilə əlaqə saxlamağa cəhd etsək də, qurum tərəfindən hələlik hər hansı açıqlama verilməyib. 

Ekspertlər: Bu, sui-istifadə halı ola bilər

Su təsərrüfatı üzrə ekspertlər bildirirlər ki, dövlət büdcəsi hesabına çəkilmiş infrastrukturdan vətəndaşların istifadə etməsinə imkan verilməməsi, əvəzində ödənişli xidmətin təklif olunması qanunsuzluq və korrupsiya əlaməti ola bilər.

“Dövlət su çəkibsə, o, vətəndaşın istifadəsinə verilməlidir. Əgər bu suyun verilməsinə maneə yaradılır və camaatdan pul yığılırsa, bu, artıq araşdırılmalı məsələdir” – deyə ekspert Cavid Məmmədov qeyd edir.

Camaat susuz, nəzarətsizlik davam edir

Yolocaq və Vərov kəndlərinin sakinləri deyirlər ki, məsələ ilə bağlı dəfələrlə yerli icra orqanlarına və su idarəsinə müraciət olunub, lakin nəticə yoxdur. İnsanlar yay istisində içməli su tapmaq üçün borc götürmək, uzaq kəndlərdən su gətirmək məcburiyyətində qalırlar.

 “Kənddə mal-qara susuz qalıb. Əkin-biçin batır. Adam başına bir maşın su almağa pul çatmır. Bu problemin qarşısı alınmasa, camaat köçmək məcburiyyətində qalacaq,” – deyə Vərov kəndindən bir sakin şikayətlənir.