Quba öz şairinə qadağa qoyur – Prezidentin təqaüd verdiyi xanım səssizliyə məhkum edilib

6 kitab müəllifi, Azərbaycan Yazıçılar Birliyinin üzvü Firəngiz Əhmədova susdurulur – Quba Mədəniyyət İdarəsi niyə bu qadından qorxur?

Bu ölkədə sənətə dəyər verilmir demirik – dövlət verir! Prezident təqaüdü ilə bunu sübut edir. Amma bir rayon çıxıb deyir: “Bizə lazım deyilsən.” Və bu cümlə təkcə bir şairəyə deyil – bütün yaradıcı qadınlara, bütöv bir poeziya nəslinə deyilir.

Firəngiz Əhmədova – Azərbaycan Yazıçılar Birliyinin üzvü, altı kitab müəllifi, Prezidentin təqaüd verdiyi şairə. Amma doğulub böyüdüyü Qubada qəsdən, ardıcıl, sistemli şəkildə sıxışdırılır. Tədbirlərə çağırılmır. Poeziya günlərində adı belə çəkilmir. Mədəniyyət evləri, məktəblər, idarələr – sanki yuxarıdan göstəriş alıb ki, bu qadını “yox” sayın.

 “Kimə mane oluram? Mənim nə vəzifəm var, nə rütbəm. Tək silahım – qələmimdir. Amma görünür, bu qələm onlara sərf etmir…”

Bu sözlər bir ruhun çırpınışıdır. Amma təkcə şəxsi giley deyil. Bu, rayon mədəniyyətindəki qaranlıq oyunların, qapalı dairələrin, “öz adamlarımız” siyasətinin ifşasıdır.

Bu susqunluq Qubanın ədəbiyyata atdığı qara kölgədir. 

Firəngiz Əhmədova təkcə özünə görə danışmır. O deyir:

 “Bu səs mənim deyil. Bu, poeziyanın, qadın yaradıcıların səsidir. Əgər altı kitab müəllifi bu rayonda ‘heç kim’dirsə – demək bu rayon öz dəyərinə özü göz yumur.”

Quba bu səsə qulaq tıxayır. Regional Mədəniyyət İdarəsi illərlə onu görməzlikdən gəlir. Niyə? Qorxduğunuz nədir? Söz? Qələm? Ruh?

Söz basdırılır, poeziya gizlədilir – və susmağa məcbur edilənlər sonda partlayır

Firəngiz Əhmədova susmur. Biz də susmuruq. Bu yazı bir səsdir – və sözün susdurulmasına qarşı üsyandır.

Birxeber.az məsələni nəzarətdə saxlayır.