Lənkəranlı fermerlər susuzluqdan əziyyət çəkir – vəd verən rəsmidən səs yoxdur

Lənkəran rayonunun Boladi kəndində, xüsusilə Məlova məhləsində fəaliyyət göstərən fermerlər çiyələk, pamidor, badımcan, qarğıdalı kimi kənd təsərrüfatı məhsullarının becərilməsi və heyvandarlıq sahəsində ciddi problemlə üzləşiblər. Söhbət susuzluqdan gedir.

Fermerlərin sözlərinə görə, əraziyə su verən əsas kanalın uzun müddətdir təmirə və təmizlənməyə ehtiyacı var. Kanalın vəziyyəti suvarma işlərini mümkünsüz hala gətirib, bu da məhsuldarlığa və heyvanların su təminatına mənfi təsir göstərir.

Bir ay əvvəl əraziyə baş çəkən və “texnika göndərəcəyəm” deyən rəsmi şəxs – Rusif Kərimovdan isə hələ də səs-soraq yoxdur. Fermerlər bildirirlər ki, artıq məhsul mövsümü başa çatmaq üzrədir və bu vəziyyət həm onların gəlirinə, həm də ailələrinin güzəranına ciddi zərbə vurur.

Şikayətçilər aidiyyəti qurumlardan və Lənkəran Rayon İcra Hakimiyyətindən məsələyə dərhal müdaxilə etmələrini, kanalın təmizlənməsi və suvarma probleminin həllini tələb edirlər.