Azərbaycan musiqisinə ağır itki: Xalq artisti Arif Babayev vəfat etdi

Azərbaycan musiqi mədəniyyəti ağır itki ilə üz-üzə qaldı. Xalq artisti, görkəmli xanəndə, muğam sənətimizin canlı əfsanəsi, professor Arif Babayev bu gün vəfat edib.

Arif Babayev təkcə Azərbaycan muğam ifaçılığı deyil, bütövlükdə milli musiqimizin inkişafında mühüm rol oynamış şəxsiyyətlərdən biri idi. O, uzun illər ərzində həm sənətkar, həm də pedaqoq kimi fəaliyyət göstərərək neçə-neçə istedadlı xanəndənin formalaşmasına səbəb olmuşdur.

Onun ifa etdiyi muğamlar xalqın yaddaşına əbədi həkk olunmuş, sənətə olan sədaqəti və ustalığı ilə muğam məktəbinin təməl sütunlarından birinə çevrilmişdi. Arif Babayevin zəngin irsi bu gün də yeni nəsil sənətçilərə yol göstərir, milli musiqimizin yaşadılmasında və dünyaya tanıdılmasında əvəzsiz rol oynayır.

Arif Babayevin vəfatı yalnız musiqi ictimaiyyətinə deyil, bütün Azərbaycan xalqına təsir edən böyük itkidir.

Allah rəhmət eləsin.

Ruhu şad, məkanı cənnət olsun.