Berlində Bundestaqa boş qalan yerlərə təkrar seçkilər başlayır

Berlində Bundestaq (Almaniya Federativ Respublikası Parlamenti) üzvlüyünə qismən təkrar seçkilər başlayıb.

Birxeber.Az-nın TASS-a istinadən məlumatına görə, yerli vaxtla saat 08:00-da seçki məntəqələri açılıb.

Federal Konstitusiya Məhkəməsinin (FCC) qərarına əsasən, 2021-ci ilin sentyabrında Almaniyada keçirilən federal seçkilər zamanı pozuntulara görə Berlində təkrar səsvermə 455 seçki məntəqəsində və müvafiq poçt məntəqələrində təşkil edilir. Həmin vaxt paytaxtda Bundestaq seçkiləri üçün 2256 seçki məntəqəsi var idi. Onların çoxunun seçkiyə pis hazırlanması, bülletenlərin itməsi və uzun növbələrin olması barədə məlumatlar verilib. Bu səbəbdən bəzi seçki məntəqələri gün ərzində müvəqqəti bağlanıb və ya səsvermə rəsmi başa çatdıqdan sonra, exit-poll nəticələri artıq dərc olunduqdan sonra fəaliyyətini davam etdirib.