Füzulidə məntəqə sədri: "Seçicilər əsasən burada quruculuq işləri ilə məşğul olan şəxslərdir"

Füzulidə 76 saylı seçki məntəqəsində qeydiyyata alınan seçicilər Qarabağın azadlığı uğrunda mübarizə aparıb, bu gün onun quruculuğunda iştirak edənlərdir.

Bu fikirləri "Report"un Qarabağ bürosunun Füzuliyə ezam olunan əməkdaşına 84 saylı Füzuli seçki dairəsinin 76 saylı seçki məntəqəsinin sədri Səttar Heydərov bildirib.

Məntəqə sədri qeyd edib ki, məntəqədə 976 seçici qeydiyyata alınıb. Onlardan 750-dən çoxu artıq səsvermədə iştirak edib: "Seçicilər əsasən burada quruculuq işləri ilə məşğul olan vətəndaşlarımızdır. Seçki prosesi tam şəffaf aparılır. Seçkilərin gedişatını 10 yerli, 8 xarici müşahidəçi izləyib. Bu vaxta qədər heç bir qayda pozuntusu qeydə alınmayıb".

Qeyd edək ki, fevralın 7-də Azərbaycanda növbədənkənar prezident seçkiləri keçirilir.

Seçkilərdə hakim Yeni Azərbaycan Partiyasının prezidentliyə namizədi İlham Əliyev, namizədliyi özü tərəfindən irəli sürülən Zahid Oruc, Milli Cəbhə Partiyasının prezidentliyə namizədi Razi Nurullayev, Böyük Quruluş Partiyasının prezidentliyə namizədi Fazil Mustafa, Böyük Azərbaycan Partiyasının prezidentliyə namizədi Elşad Musayev, Bütöv Azərbaycan Xalq Cəbhəsi Partiyasının prezidentliyə namizədi Qüdrət Həsənquliyev və namizədliyi özü tərəfindən irəli sürülən Fuad Əliyev mübarizə aparır.