Kubanıçbek Ömüralıyev: “TDT-nin müşahidəçiləri Şuşa və Xankəndidə seçkiləri izləyirlər”

Türk Dövlətləri Təşkilatından (TDT) bəzi müşahidəçilər Azərbaycanın işğaldan azad edilmiş ərazilərində prezident seçkilərini izləyirlər.

“Birxeber.Az” xəbər verir ki, bu barədə jurnalistlərə açıqlamasında TDT-nin Baş katibi Kubanıçbek Ömüralıyev bildirib.

O qeyd edib ki, təşkilatın müşahidə missiyası iki qrupa bölünüb: “Onlardan biri işğaldan azad edilmiş ərazilərdə, o cümlədən Şuşa və Xankəndidə seçkiləri izləyir”.

Baş katib həmçinin xatırladıb ki, seçkilər ərəfəsində TDT-dən olan müşahidəçilər Azərbaycan Mərkəzi Seçki Komissiyasının sədri Məzahir Pənahov, xarici işlər naziri Ceyhun Bayramov, eləcə də qeydə alınmış prezidentliyə namizədlərlə görüşlər keçiriblər.

“Seçkilər hər bir ölkə üçün mühüm hadisədir. Bugünkü seçkiləri Azərbaycan üçün tarixi adlandırmaq olar, çünki onlar suveren ölkənin bütün ərazisində ilk dəfə keçirilir. Bu münasibətilə Azərbaycan xalqını təbrik edirəm”, - K.Ömüralıyev vurğulayıb.