Pakistandan Azərbaycana turist axınının artırılması üçün yeni imkanlar açılır

Bakı ilə Kəraçi arasında birbaşa aviareysin açılması Pakistandan Azərbaycana turist axınının artırılması üçün perspektivlər açır.

“Birxeber.Az-Economics” xəbər verir ki, bunu Pakistanın “Zeb Travels” turistik şirkətinin rəhbəri Cahan Zeb Havaca “Azərbaycan Hava Yolları”nın (AZAL) Bakıdan Karaçi şəhərinə birbaşa reysin açılışı ilə əlaqədar təşkil olunan media-tur çərçivəsində bildirib.

“Azərbaycan Pakistan üçün çox önəmli ölkədir. Kəraçinin Pakistanın 30 milyondan çox əhalisi olan ən böyük şəhəri olduğunu nəzərə alsaq, bu, Azərbaycana turist axınının artırılması baxımından böyük imkanlar açır”, - Cahan Zeb Havaca qeyd edib.

Onun sözlərinə görə, Azərbaycan pakistanlı turistlər üçün həm viza almaq məsələsində, həm də qiymət baxımından əlverişli bir istiqamətdir.

Qeyd etmək lazımdır ki, Azərbaycanın milli aviadaşıyıcısı AZAL aprelin 18-də Bakıdan Pakistanın Kəraçi şəhərinə ilk reysini yerinə yetirib. Bakı və Kəraçi arasında uçuşlar həftədə iki dəfə — Bakıdan Kəraçiyə cümə axşamı və bazar günləri, əks istiqamətdə isə bazar ertəsi və cümə günləri həyata keçirilir.

Kəraçi AZAL-ın marşrut şəbəkəsində Pakistanın sayca üçüncü şəhəri oldu. Həmçinin aviaşirkət Pakistanın paytaxtı İslamabada və bu ölkənin digər böyük şəhəri olan Lahora müntəzəm reyslər yerinə yetirir.