Prezident İlham Əliyev: Brüsseldəki görüş Azərbaycanın və Cənubi Qafqazda iş birliyinin əleyhinədir

Azərbaycan dövlət başçısı İlham Əliyev bu gün ABŞ, Avropa İttifaqı və Ermənistan arasında Brüsseldə keçiriləcək üçtərəfli görüşə toxunub.

APA xəbər verir ki, bu gün Türkiyənin sabiq xarici işlər naziri, Türkiyə Böyük Millət Məclisinin millət vəkili və NATO Parlament Assambleyasındakı nümayəndə heyətinin rəhbəri Mövlud Çavuşoğlunu qəbul edərkən bildirib ki, bununla Cənubi Qafqaz üçün növbəti təhlükə mənbəyi yaradılır.

“Halbuki, son günlər həm ABŞ-ın, həm də Avropa İttifaqının yüksək vəzifəli şəxsləri onların təşəbbüsü ilə baş tutan telefon danışıqları əsnasında bizi inandırmağa çalışmışlar ki, bu görüş Azərbaycanın əleyhinə deyil”, - Prezident İlham Əliyev vurğulayıb.

Prezident qeyd edib ki, lakin biz bunun Azərbaycanın və Cənubi Qafqazda iş birliyinin əleyhinə olduğunu bilirik: “Bu, ayırıcı xətlərin yaradılması və ölkəmizi təcrid etmək məqsədi güdür”.