“Qarabağ” ardıcıl qələbə sayında Avropa rekordçusudur

“Qarabağ” 2022/2023 mövsümündə ölkə çempionatlarında ardıcıl qələbə sayına görə Avropa rekordçusudur.

“Birxeber.Az”un araşdırmasına görə, Ağdam təmsilçisi mövsümün əvvəlində Premyer Liqada qazandığı ard-arda 13 qələbə sayəsində hələ də əlçatmazdır.

Uels klubu TNS-dən sonra Şotlandiya “Seltik”i rekordun bir addımlığında büdrəyərək, şansı əldən verib. Həmçinin İtaliya A seriyasının ötən turunda “İnter”ə məğlub olan “Napoli”nin (0:1) qalibiyyət seriyası 11 matçda dayanıb.

Hazırda “Qarabağ”ın rekordunu təkrarlamağa ən yaxın komanda Serbiya təmsilçisi “Srvena Zvezda”dır. Ölkə çempionatının son 11 qarşılaşmasında rəqiblərini məğlub edən adıçəkilən komanda seriyasını davam etdirir. Həmçinin, keçirdikləri son 9 görüşdə qələbə qazanan “Makkabi” (Hayfa, İsrail) və AEK (Kipr) də Azərbaycan çempionuna çatmaq şansını davam etdirirlər.

Qeyd edək ki, AEK daxili birincilikdə növbəti oyununu yanvarın 7-də, “Makkabi” 8-də keçirəcəksə, Serbiya çempionatında qış fasiləsi fevralın 4-də “Srvena Zvezda”nın matçı ilə başa çatacaq.