Rövşən Oğuz Şirkəti: Gəncə İdman Sarayında baş vermis tüstülənmə tikintiyə ziyan vurmayıb

“Gəncə İdman Sarayında tikinti işləri yerinə yetirilərkən deşici alətdən yaranmış qığılcım səbəbindən fasadda nəmə qarşı quraşdırılmış 0,5m2 membran tüstülənib. Həmin an təcili şəkildə şirkət əməkdaşları tərəfindən müdaxilə edilərək binada quraşdırılmış yanğın balonları vasitəsilə tüstülənmənin yanğına keçməsinin qarşısı alınıb, yanğın fəsadsız ötüşüb”.

Bunu Birxeber.Az-ya açıqlamasında Gəncə İdman Sarayını inşa edən Rövşən Oğuz Şirkətinin Baş direktorunun müavini Elvin Kərəmli deyib.

O bildirib ki, baş vermiş hadisəyə daha ciddi yanaşılıb və şirkət rəhbərliyi Fövqəladə Hallar Nazirliyinin Yanğından Mühafizə Xidmətinə məlumat verib: “Qısa zamanda Yanğından Mühafizə Xidmətinin texnikası və əməkdaşları hadisə yerinə gəlib. Ancaq Yanğından Mühafizə Xidmətinin heç bir müdaxiləsinə ehtiyac qalmayıb. Belə ki, xidmət işçiləri yerində texniki baxış həyata keçirərək yoxlamalar aparıb, heç bir yanğın təhlükəsi olmadığını qeyd edərək geri dönüblər. Tüstünün qarşısı alınarkən yanğın söndürmə balonlarından istifadə zamanı balonlardakı qazın təsirindən 3 nəfər zəhərlənib, onlara 3 nömrəli şəhər xəstəxanasında ilkin tibbi yardım göstərilərək evə buraxılıb. 1 nəfərin isə həyəcandan qan təzyiqi yüksəlib, ona da tibbi yardım göstərilib və evə buraxılıb. Tüstülənmə zamanı tikintiyə heç bir maddi ziyan dəyməyib”, - deyə E. Kərəmli əlavə edib.

Qeyd edək ki, bu gün Gəncədə Nizami Gəncəvi prospektində yerləşən yeni tikilən İdman Sarayının damında tüstülənmə olub. Dərhal hadisə yerinə Fövqəladə Hallar Nazirliyinin yanğın söndürən avtomobilləri və canlı qüvvəsi cəlb olunub. Tüstülənmənin qarşısı alınıb. Hadisə vaxtı 3 nəfər zəhərlənib. Zəhərlənənlər 1994-cü il təvəllüdlü Kamil Hüseynov, 1985-ci il təvəllüdlü Amid Babayev və 1992-ci il təvəllüdlü Binyamin Əlibəylidir.