Finlandiya və ABŞ milli təhlükəsizlik sahəsində əməkdaşlığı dərinləşdirmək barədə razılığa gəliblər

Finlandiya və ABŞ milli təhlükəsizliklə bağlı əməkdaşlığın dərinləşdirilməsi, məlumat mübadiləsi və tədqiqatların aparılmasına dair saziş imzalayıblar.

Birxeber.Az xəbər verir ki, bu barədə Finlandiya Daxili İşlər Nazirliyi məlumat yayıb.

"Təhlükəsizlik mühitimiz getdikcə qeyri-sabit olur. Məsələn, kritik infrastruktura hibrid təsir və təhdidlər bizim təhlükəsizlik institutlarımız üçün problemlər yaradır. Texnoloji dəyişikliklərin tempi sürətlənir və texnologiya getdikcə geosiyasət, iqtisadiyyat və təhlükəsizliklə əlaqələndirilir. Bu birgə niyyət bəyanatı milli təhlükəsizlik məsələlərində səmərəli elmi-texniki əməkdaşlıq üçün yaxşı başlanğıcdır”, – deyə bildirilib.

İki ölkə arasında əməkdaşlıq yazda müxtəlif mövzularda keçiriləcək seminarlarla başlayacaq.

Onlar gələcək texnologiyaları öyrənəcək və elmi əməkdaşlıq imkanlarını müəyyən edəcəklər.

Bu, son beş gün ərzində ölkələr arasında imzalanmış ikinci sazişdir. Yanvarın 24-də kibermüdafiə sahəsində əməkdaşlığın dərinləşdirilməsinə dair sənəd imzalanıb.