Baş katib: Ermənistan KTMT-nin üzvü kimi fəaliyyət dairəsini xeyli azaldıb

“Dondurmaq” anlayışı Kollektiv Təhlükəsizlik Müqaviləsi Təşkilatının (KTMT) sənədlərində əksini tapmayıb, ona görə də biz onu mövcud vəziyyətlə bağlı istifadə etməyəcəyik.

Birxeber.Az-nın Moskva müxbiri xəbər verir ki, bunu KTMT-nin baş katibi İmanqali Tasmaqambetov News.ru-ya müsahibəsində bildirib.

Onun sözlərinə görə, Ermənistan həqiqətən də KTMT-nin üzvü kimi fəaliyyət dairəsini xeyli azaldıb: "Lakin buna baxmayaraq, iş davam edir, Katibliyin gündəliyinə daxil olan bütün məsələlər işçi qaydada müzakirə olunur. Bu məsələyə aydınlıq gətirilməsi, ilk növbədə, tam planlaşdırma üçün birliyimizin bütün iştirakçıları üçün faydalı olardı".

Baş katib xatırladıb ki, KTMT kimi alyansda iştirak preroqativdir və bunun sayəsində iştirakçının ağlabatan yanaşma ilə milli təhlükəsizliyi tam təmin etmək imkanı var, xüsusən də ölkənin geosiyasi mövqeyi elədir ki, çağırışlar və təhdidlər var və bu, çox vaxt yerli analitiklər tərəfindən ekzistensial kimi qiymətləndirilir.

Tasmaqambetov qeyd edib ki, təşkilatda əvvəlki həcmdə fəaliyyəti bərpa etmək qərarı yalnız Ermənistanın siyasi rəhbərliyindən asılıdır. O, həmçinin əlavə edib ki, analitiklər Cənubi Qafqazda vəziyyətin pisləşməsi tendensiyasını qeyd edirlər: "Aydındır ki, belə risklər mövcuddur. Ona görə də region ölkələrinin siyasi rəhbərliyinin üzərinə, ilk növbədə, öz xalqları qarşısında böyük məsuliyyət düşür" .

Tasmaqambetov vurğulayıb ki, KTMT Katibliyi, öz növbəsində, regionda təhlükəsizliyin təmin edilməsi ilə bağlı problemləri təşkilatın məqsədlərinə, imzalanmış sənədlərə və səsləndirdiyi təşəbbüslərə uyğun olaraq həll etməyə həmişə hazırdır.