Almaniyalı mütəxəssis yenidən "Bavariya"nın baş məşqçisi ola bilər

"Bavariya" klubunda Tomas Tuxelin gedişindən sonra baş məşqçi postuna əsas namizəd müəyyənləşib.

"Report" "Bild" nəşrinə istinadən xəbər verir ki, bu, hazırda Almaniya millisinə rəhbərlik edən Yulian Nagelsmanndır.

Münhen təmsilçisinin idman direktoru Maks Eberl 36 yaşlı alman mütəxəssisi yenidən komandaya qaytarmaq istəyir.

Qeyd edək ki, Yulian Nagelsmann 2021-2023-cü illərdə "Bavariya"nın "sükanı arxasında" olub. O, klubdan ayrıldıqdan sonra yığmada işləyir. Hazırkı Almaniya çempionu daha əvvəl mövsümün sonunda Tomas Tuxellə vidalaşacağını açıqlayıb.