"Zirə"nin legioneri: "Bayer 04" ilə başabaş oynayan komandanı üstələmək asan deyil - MÜSAHİBƏ

Nigeriyalı futbolçu Abbas İbrahim ötən ilin qışında "Zirə"yə transfer olunub. Yarımmüdafiəçi bu mövsüm "qartallar"ın heyətində 18 matçda meydanda olub. Qol hesabını aça bilməyən futbolçunun müqavilə müddəti 2025-ci ilin fevralında başa çatacaq.

Abbas İbrahim Azərbaycan Premyer Liqasının 26-cı turunda keçirilən "Qarabağ" - "Zirə" matçından (3:1) sonra "Report"un suallarını cavablandırıb.

- Qarşılaşma barədə nə deyə bilərsiniz?

- "Qarabağ"la matç kifayət qədər çətin keçdi. "Bayer 04" ilə başabaş oynayan komandanı üstələmək asan deyil. Həmçinin bu cür qarşılaşmalarda təcrübə toplamağa çalışırıq. Düşünürəm ki, onların hücumlarının qarşısını ala bilirdik. Yenə də futbolda həmişə istədiyin olmur. "Kəpəz"lə qarşıdakı matç barədə düşünməliyik.

- Matç ərzində qaçırdığınız qol şansları oldu. Bu barədə nə deyə bilərsiniz?

- Düşünürəm ki, "Qarabağ"la matçlarda belə epizodlar yaratmaq olduqca yaxşıdır. Bu, futboldur, burda həmişə yekun nəticə önəmlidir. Bəzən epizodlar yaratsan da, düzgün istifadə edə bilmirsən. Rəqib əlinə düşən fürsətlərdən maksimum yararlandı. Hazırda yalnız "Kəpəz"lə matçın hazırlıqları barədə düşünməliyik.

- "Kəpəz"lə matçı doğma meydanda keçirməyəcəksiniz. Bu vəziyyətə münasibətiniz necədir?

- "Kəpəz"ə qarşı matçlar həmişə çətin olur. Amma hazırlaşmalı, mübarizəmizə davam etməliyik. Çempionatda məqsədimiz xallar qazanmaq, hər matçda qələbələri sıralamaqdır.

- "Zirə" Premyer Liqada vurduğu qolların sayının az olmasına görə digər klublardan ciddi şəkildə fərqlənir. Əsas çətinlik nədir?

- Bizim problem əlimizə düşən fürsətləri istifadə edə bilməməyimizdir. Bir matçda çoxsaylı qol imkanları yaratsaq da, fərqlənə bilməmişik. İnsanlar bu barədə tənqidi fikirlər səsləndirə bilər. Sadəcə, bəzi epizodlarda bəxtimiz gətirmir. Düşünürəm ki, son 2 oyunda bunun üzərində işləyib qollar vurmağı bacarırıq. Qarşıdakı matçlarda da bu qolların davamı gələcək.

- Komanda daxilində problemlər var?

- Xeyr, hər şey qaydasındadır. Futbolda səhvlər edirsənsə, rəqib səni cəzalandıracaq. Amma çalışıb bu cür xətaları aradan qaldırmaq lazımdır. "Qarabağ"la matçda ən yaxşısını etməyə çalışdıq.

- Bu gün öz çıxışınızı necə dəyərləndirirsiniz?

- Qarşılaşma ərzində rəqibə təzyiq göstərməyə çalışdım. Hazırda öz çıxışım qane edir. Məşqlərdə daim daha yaxşısını etmək üçün səy göstərirəm.