Ali Məhkəmədə fəaliyyətlərini uğurla başa vuran "Femida" könüllülərinə sertifikatlar verilib

Ali Məhkəmədə fəaliyyətlərini uğurla başa vuran "Femida" könüllülərinə sertifikatların təqdimetmə mərasimi keçirilib.

"Report" xəbər verir ki, mərasimdə iştirak edən Ali Məhkəmə Aparatının rəhbəri Elvin Hətəmzadə, Daxili nəzarət və insan resursları şöbəsinin müdiri Mahir Məlikov və “Femida Könüllüləri” Təşkilatının sədri Nilgün Məmmədova könüllülərin fəaliyyəti barədə fikirlərini bölüşüb, onların məhkəmə işinə verdiyi töhfədən bəhs ediblər.

Sonra məzun olan "Femida" könüllüləri sertifikatlarla təltif ediliblər.

Qeyd edək ki, könüllülər oktyabr-dekabr və noyabr-yanvar ayları ərzində Ali Məhkəmədə fəaliyyətdə olublar. Onlar ilkin və yekun qiymətləndirməni uğurla keçərək, fəaliyyətlərini başa çatdırıblar.

Xatırladaq ki, “Femida Könüllüləri” Təşkilatı Azərbaycan Respublikasının Ali Məhkəməsində fəaliyyət göstərən bir qrup könüllü gəncin təşəbbüsü ilə təsis edilib. Təşkilatın yaradılmasında məqsəd gənc peşəkar hüquqşünasların yetişdirilməsinə dəstək göstərmək, məhkəmə-hüquq sistemində gənclərin iştirakçılığını artırmaq, məhkəmə xidmətlərində vətəndaş məmnuniyyətinin təmin etmək, məhkəmə-hüquq sistemində aparılan islahatların təbliğ və tətbiqinə dəstək göstərmək, ölkədə aparılan təhsil və gənclər siyasətinə töhfə verməkdir. 2023-cü ilin sentyabr ayından etibarən ümumilikdə 134 nəfər hüquq təhsili alan gənc müxtəlif məhkəmə orqanlarında könüllülük fəaliyyətini başa vurub. 2024-cü ilin fevral ayından 21 müxtəlif instansiya məhkəmələrində könüllülük fəaliyyətinin təşkil edilməsi nəzərdə tutulur.