Kimberly D. Harrington: "COP-a ev sahibliyi edən Azərbaycan digər neft-qaz ölkələri üçün nümunə yaradır"

BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) ev sahibliyi edən Azərbaycan enerji təhlükəsizliyi və iqlim məsələlərini uzlaşdırmaqla digər neft-qaz ölkələri üçün nümunə yaradır.

"Birxeber.Az" xəbər verir ki, bunu ABŞ Dövlət Katibinin Enerji Resursları Bürosu üzrə köməkçisinin müavini Kimberly D. Harrington bu gün Bakıda energetika naziri Pərviz Şahbazovla keçirilən görüşdə deyib.

Harrington martın 1-də Bakıda keçiriləcək Cənub Qaz Dəhlizi Məşvərət Şurası nazirlərin 10-cu iclası və Yaşıl Enerji Məşvərət Şurası nazirlərin 2-ci iclasında iştirak etmək üçün Azərbaycana səfər edib.

Görüşdə iki ölkə arasında uzunillik uğurlu enerji tərəfdaşlığının davam etdirilməsindən məmnunluq ifadə edilib. Cənub Qaz Dəhlizinin enerji böhranı zamanı Avropanın enerji təhlükəsizliyinin təminatındakı rolu qeyd edilib və hazırda bu layihənin genişləndirilməsi ilə bağlı cari vəziyyət nəzərdən keçirilib.

P. Şahbazov hazırda Azərbaycanın layihənin genişləndirilməsi və əlavə tədarüklərin təmin edilməsi ilə yanaşı, enerji keçidi üzrə də mühüm addımlar atdığını qeyd edib. Bildirilib ki, Azərbaycan Respublikasının Prezidenti cənab İlham Əliyev tərəfindən enerji sektorunda islahatara və bərpa olunan enerjinin inkişafına güclü dəstək var. Həyata keçirilən “yaşıl enerji” layihələri, “Xəzər-Qara dəniz-Avropa Yaşıl Enerji Dəhlizi” ölkəmizin enerji keçidinə sadiqliyinin göstəriciləridir.

Söhbət zamanı hidrogen, metan emissiyalarının azaldılması, COP29 çərçivəsində, həmçinin bir sıra ikitərəfli əməkdaşlıq məsələləri ilə bağlı fikir mübadiləsi aparılıb.