Gürcüstan Prezidenti Salome Zurabişvili vətəndaşları, xüsusilə gəncləri və diaspor nümayəndələrini bu payızda keçiriləcək parlament seçkilərində mümkün qədər fəal olmağa çağırıb.
“Birxeber.Az” Gürcüstan KİV-ə istinadən xəbər verir ki, o, bu barədə parlamentdə illik hesabatı ilə bağlı çıxışında bildirib.
Onun sözlərinə görə, bu, ölkə tarixində həlledici mərhələdir:
“Bunlar sadə seçkilər olmayacaq. İndi tariximizin həlledici mərhələsidir. Biz isə elə bir mərhələdəyik ki, gələcəyimizi seçkilər yolu ilə müəyyənləşdirməliyik: yeni idarəetmə modelinə, iqtisadiyyata, yəni yeni Avropa dövlətinə səs verməliyik”, - o qeyd edib.
S.Zurabişvili vurğulayıb ki, gürcü diasporunun bütün nümayəndələri, o cümlədən müxtəlif ölkələrdə qeyri-qanuni yaşayan Gürcüstan vətəndaşları seçkilərdə iştirak edə bilərlər.
Xatırladaq ki, Gürcüstanda parlament seçkiləri oktyabrın 26-da keçiriləcək.