Birxeber.az / Mübariz Ağayev: "Azərbaycanda nəqliyyat vasitələrinin 45 %-nin istismar müddəti 20 ildən çoxdur"

Mübariz Ağayev: "Azərbaycanda nəqliyyat vasitələrinin 45 %-nin istismar müddəti 20 ildən çoxdur"

1-02-2024, 18:40

Azərbaycanda qeydə alınan nəqliyyat vasitələrinin 45 %-dən çoxunun istehsal ili 20 il və daha çoxdur.

"Birxeber.Az" xəbər verir ki, bunu Daxili İşlər Nazirliyinin Baş Dövlət Yol Polisi İdarəsinin rəsmisi, polis polkovnik-leytenantı Mübariz Ağayev nəqliyyat vasitələrinin utilizasiyası, mövcud vəziyyət və qarşıda duran məsələlərlə bağlı keçirilən dəyirmi masada deyib.

Onun sözlərinə görə, bu, yol nəqliyyat hadisələri zamanı onların ağırlıq dərəcəsinə bilavasitə təsir edir.

M. Ağayev bildirib ki, ötən il ölkədə 1 milyon 774 min 77 yol-nəqliyyat vasitəsi qeydə alınıb:

"Onlardan istehsal ili 10 ilə qədər olanların sayı 15 % təşkil edir, yəni 266 min 878-ə bərabərdir. İstehsal ili 10 ildən 20 ilə qədər olanların sayı 707 min 673-dür ki, bu da 39,3 % təşkil edir. İstehsal ili 20 ildən yuxarı olanların sayı 799 min 526-ya bərabərdir. Yəni, respublika üzrə avtomobil parkında nəqliyyat vasitələrinin 45,1 %-nin yaşı 20 ildən yuxarıdır. Hazırda ölkəmizdə hibrid avtomobillərinin sayı 42 min 461, elektrik mühərrikli avtomobillərin sayı isə 3 min 138-dir. Onların sayında kifayət qədər artım var".

Geri qayıt