Azərbaycanın yeniyetmə sablyaçıları Rumıniyanın paytaxtı Buxarestdə keçirilən “Riposta Cup” turnirində çıxışlarını başa vurublar.
Azərbaycan Qılıncoynatma Federasiyasının mətbuat xidmətindən "Report"a verilən məlumata görə, oğlanların şəxsi yarışında ən yaxşı göstərici 150-dən çox iştirakçı arasında 11-ci olan Nahid Məmmədliyə məxsusdur.
Timur Husnaddinov, Abbas Hüseynov və Rəsul Əliyev isə ümumi sralamada ilk "50-lik"də yer almağı bacarıblar.
Qız sablyaçıların şəxsi mübarizəsində 140 iştirakçı arasında iki qılıncoynadanımız ilk "20-lik"də yer alıblar. Valentina Zeynalova ümumi sıralamada 16-cı, Züleyxa Sultanlı isə 19-cu olub.
Yeniyetmə qız sablyaçıların komanda yarışında Valentina Zeynalova, Leyla Əhmədova, Fərəh Abasova və Züleyxa Sultanlıdan ibarət yığma ilk görüşündə Bolqarıstanı təmsil edən kollektivi 45:18 hesabı ilə məğlub edib. Növbəti görüşdə Rumıniya yığmasına 45:32 hesabı ilə qalib gələn milli finala yüksəlmək uğrunda keçirilən görüşdə Böyük Britaniya komandasına 28:45 hesabı ilə uduzub.
Rəsul Əliyev, Abbas Hüseynov, Nahid Məmmədli və Timur Husnaddinovdan ibarət sablya üzrə yeniyetmə oğlanlardan ibarət komanda ümumi sıralamada beşinci olub.
İlk görüşündə Bolqarıstan yığmasına 45:39 hesabı ilə qalib gələn komandamız yarımfinala yüksəlmək uğrunda keçirilən qarşılaşmada Rumıniya millisinə 44:45 hesabı ilə uduzub.