Aydın Əlibəyov ən perspektivli idmançılarımızdan biridir və onun 2028-ci ildə Yay Olimpiya Oyunlarında iştirakını nəzərdə tutmuşuq.
Bunu "Birxeber.Az"a açıqlamasında Azərbaycan Respublikası Atçılıq Federasiyasının (ARAF) baş katibi Bəhruz Nəbiyev Rusiyanın paytaxtı Moskvada atçılığın dresaj növü üzrə keçirilən “Maksima Masters” çempionatında 6 qızıl medal qazanan təmsilçimiz haqqında danışarkən deyib.
ARAF rəsmisi Aydın Əlibəyovun sözügedən yarışda uğurlu çıxış etdiyini vurğulayıb: "Bu nəticə Avrasiya tarixində rekorddur. İndiyədək hansısa idmançı bir turnirdə fərqli kateqoriyalarda bu qədər qızıl medal əldə etməyib. O, həm də bizim dresaj növü üzrə ilk idmançımızdır. Bu, olimpiadanın proqramında yer alan üç növdən biridir. Daha əvvəl konkur növündə iki dəfə Camal Rəhimov Yay Olimpiya Oyunlarında Azərbaycanı təmsil edib. Ümumilikdə üç idmançımız beynəlxalq yarışlarda iştirak edirlər. Aydın Əlibəyov Rusiyanın Sankt-Peterburq şəhərində yaşayır və əsasən Moskvadakı turnirlərdə mübarizə aparır. Aqata və Karina Zəhrabəyova Almaniyada təlimlərə qatılırlar və Avropadakı müxtəlif yarışlarda iştirak edirlər. Onların da 2028-ci ildəki olimpiadaya qatılması üçün hazırlıqlar görəcəyik".
Baş katib Camal Rəhimovun idmançı karyerasını başa vurmadığını söyləyib: "Amma o, artıq Belçikada yaşayır. Bəzi hallarda, çox sıx-sıx olmasa da, turnirlərə qatılır. Federasiyamız onun iştirakı üçün lazım olan sifarişləri göndərir. Camal Rəhimov hazırda millinin tərkibində deyil. Bunun nə ilə bağlı olduğunu özündən soruşsanız, daha yaxşı olar. Çünki biz bilmirik. Bir müddətdir ki, turnirlərdən kənardadır".