Qızılcaya yoluxma bütün yaş qruplarında görülsə də, əsasən 1-8 yaş qrupunda olan uşaqlar daha həssas hesab olunurlar.
APA xəbər verir ki, bunu Səhiyyə Nazirliyi K.Y.Fərəcova adına Elmi-Tədqiqat Pediatriya İnstitutun infeksionisti Səbinə Cəfərova deyib.
Həkim xatırladıb ki, qızılcaya qarşı peyvənd olmayan və xəstəliyi keçirməyənlər qızılcaya yoluxa bilərlər.
İnfeksionistin sözlərinə görə, qızılcaya 1 yaşa qədər körpələr də yoluxa bilər:
“Belə ki, əgər ana qızılcaya yoluxubsa, bu zaman uşaqlarda immunitet formalaşır və bu immunitet 9 aya qədər qala bilər. Amma bəzən 3 aydan 1 yaşa qədər olan uşaqlar da qızılcaya yoluxa bilərlər. Hansı ki həmin körpələrin anaları nə peyvənd olunub, nə də qızılcaya yoluxub”.
Onun sözlərinə görə, qızılca peyvəndindən sonra orqanizmdə, təxminən, 10-13 il davamlı immunitet yaranır.