Azərbaycanda avtomobil idxalı azalıb

Bu ilin yanvar ayında Azərbaycan 113,4 milyon ABŞ dolları dəyərində 6 191 ədəd müxtəlif təyinatlı avtomobil idxal edib.

“APA-Economics”in Dövlət Gömrük Komitəsinə (DGK) istinadən xəbərinə görə, ötən ilin yanvar ayı ilə müqayisədə 10 faiz azalma olub.

İlk ayda sürücü daxil olmaqla 10 nəfər və yaxud daha çox adam daşımaq üçün nəzərdə tutulmuş motorlu nəqliyyat vasitələrinin idxalı dəyişməyərək 20 ədəd, sərnişinlərin daşınması üçün nəzərdə tutulan minik avtomobilləri və digər motorlu nəqliyyat vasitələrinin idxalı isə 12,6 % azalaraq 5 643 ədəd təşkil edib.

Qeyd edək ki, 40,2 milyon ABŞ dolları dəyərində olan bu avtomobillərin 1 235-i daxili yanma mühərriklə yanaşı, elektrik mühərriklə də hərəkətə gətirilən nəqliyyat vasitələri, 9,663 milyon ABŞ dolları dəyərində olan 239 nəqliyyat vasistəsi isə yalnız elektrik mühərriklə hərəkətə gətirilən nəqliyyat vasitələridir.