Qara Qarayevin durumuna aydınlıq gəlib

Fransada "Nant"a qarşı keçirilən UEFA Avropa Liqasının qrup mərhələsinin V tur oyununda zədələnən "Qarabağ"ın kapitanı Qara Qarayevin durumuna aydınlıq gəlib.

"Report"un məlumatına görə, bu barədə 30 yaşlı yarımmüdafiəçi "CBC Sport"a açıqlama verib. O, zədəsinin ciddi olmadığını söyləyib.

Təcrübəli oyunçu bildirib ki, oynamağa davam etsəydi, vəziyyəti ağırlaşa bilərdi: "Qaçmağıma mane olan zədə idi".

1:2 hesabı ilə uduzduqları görüşlə bağlı da danışan Qarayev matça yaxşı hazırlaşdıqlarını vurğulayıb: "Hesab fərqli ola bilərdi. Amma futbol belədir. Bəzən 90 dəqiqə üzülürsən, son dəqiqə qolu ilə gülürsən. Bəlkə də hesab bizə arxayınlıq verdi. Amma hələ heç nə itirilməyib".

O, Bakıda Almaniya "Frayburq"una qarşı keçirəcəkləri sonuncu - VI tur oyununa da toxunub: "Bu görüş haqqında danışmaq çətindir. Rəqibin üstün tərəflərini bilirik. Amma proqnoz verməyi özümə rəva bilmirəm. Matça ən yaxşı şəkildə hazırlaşacağıq. Biz pley-offa layiq komandayıq".