Naxçıvandan Türkiyəyə ixracın genişləndirilməsi məsələsi müzakirə edilib

Bu gün Naxçıvan Muxtar Respublikası iqtisadiyyat nazirinin müavini, nazir vəzifəsini müvəqqəti icra edən Abbas İsmayılov sahibkarlarla görüşüb.

APA-nın Naxçıvan bürosu xəbər verir ki, görüşdə Naxçıvandan Türkiyəyə güzəştli rejim çərçivəsində ixracın genişləndirilməsinə dair fikir mübadiləsi aparılıb.

Naxçıvan iqtisadiyyatının davamlı inkişafına böyük önəm verildiyini diqqətə çatdıran Abbas İsmayılov bölgənin potensialının reallaşdırılması və yeni məhsulların ixrac imkanlarının genişləndirilməsinin əhəmiyyətini vurğulayıb.

Görüşdə istehsalın və ixracın artırılması üçün həyata keçirilməli olan tədbirlərlə bağlı təkliflər dinlənilib.