Macarıstanda müxalifətin birbaşa prezident seçkiləri ilə bağlı təklifi rədd edilib

Macarıstanda müxalifətin birbaşa prezident seçkiləri ilə bağlı təklifi rədd edilib

Macarıstanın hakim partiyası müxalifətin dövlət başçısı Katalin Novakın istefası ilə bağlı irəli sürdüyü birbaşa prezident seçkiləri təklifini dəstəkləməyəcək.

“Report” xəbər verir ki, bunu “FİDES - Macarıstan Vətəndaş Birliyi” parlament fraksiyasının lideri Mate Koçiş deyib.

Macarıstan Konstitusiyasına uyğun olaraq, prezident parlament tərəfindən seçilir, indi səslərin üçdə ikisindən çoxu “FİDES” və onların tərəfdaşları olan Xristian Demokratlara məxsusdur.

Ən böyük müxalifət partiyaları - Demokratik Koalisiya və Sosialistlər prezidentin deputatların qərarı ilə deyil, birbaşa vətəndaşların səsverməsi ilə seçilməsini təklif ediblər. Onlar həmçinin iyunda Avropa Parlamentinə seçkilərlə yanaşı prezident seçkilərinin də keçirilməsini istəyiblər.

“Koçiş bildirib ki, müxalifət nümayəndələrinin sualı bu cür qoymağa haqqı yoxdur, çünki əvvəllər hakimiyyətdə olub hökuməti formalaşdıran zaman “onlar belə düşünmürdülər”.

“Belə çıxır ki, sol partiyalar hakimiyyətdə olanda prezidenti parlament seçir, onlar hakimiyyəti itirdikdə isə xalq tərəfindən seçilir. Belə oyunlara qarışmaq qəribə olardı”.