Rusiyada neft emalı zavodunun ərazisinə hücum olub, güclü yanğın baş verib - YENİLƏNİB

Ukrayna Rusiyanın Krasnodar vilayətində iki neft emalı zavoduna pilotsuz uçuş aparatları (PUA) ilə hücum edib.

“Report” UNIAN-a istinadən xəbər verir ki, bu barədə Ukrayna Təhlükəsizlik Xidməti məlumat yayıb.

Bildirilib ki, həm İlskı, həm də Afipski rayonlarındakı zavodlar hədəf alınıb.

Hücumların davam etdirildiyi qeyd olunub.

“Zavodların vurulması nəticəsində Rusiya təyyarələr üçün dizel yanacağı istehsal edə bilməyəcək. Belə zavodun qiyməti 50 milyon dollardır. Onlar tamamilə qanuni hədəflərdir. Onlar təkcə müdafiə sənayesi üçün işləyir və rus qoşunlarını yanacaqla təmin etmir, həm də Rusiya iqtisadiyyatı üçün vacibdir”, - məlumatda vurğulanıb.

Bu gecə Rusiyanın Krasnodar diyarında İlski neft emalı zavodunun ərazisində güclü yanğın olub.

“Report” xəbər verir ki, bu barədə Ukrayna KİV-i məlumat yayıb.

Bildirilib ki, ərazidə partlayış səsləri eşidilib.

Zavod ərazisinə pilotsuz uçuş aparatları (PUA) ilə hücum edildiyi ehtimal edilir.

Hadisə barədə hələ ki rəsmi məlumat yoxdur.