Şamil Ayrım: "Böyük əksəriyyət İlham Əliyevə səs verdi, həyata keçiriləcək vacib işlərin qarşısını açdı"

Şamil Ayrım: "Böyük əksəriyyət İlham Əliyevə səs verdi, həyata keçiriləcək vacib işlərin qarşısını açdı"

Böyük əksəriyyət İlham Əliyevə səs verdi, ölkədə bundan sonra həyata keçiriləcək vacib işlərin qarşısını açdı.

"Report" xəbər verir ki, bunu Türkiyə Parlamentinin nümayəndə heyətinin rəhbəri Şamil Ayrım deyib.

Onun sözlərinə görə, Azərbaycan vətəndaşları ölkələrini 7 il idarə edəcək prezidenti seçmək üçün səs verdilər: "Azərbaycan ilk dəfə bütöv Azərbaycan ərazisində səs verdilər. Onların böyük əksəriyyəti Müzəffər Ali Baş Komandan İlham Əliyevə səs verdilər. Bununla da ölkədə bundan sonra həyata keçiriləcək vacib işlərin qarşısını açdılar. Azərbaycan 44 günlük müharibəsi, ardınca 23 saatlıq antiterror əməliyyatı ilə ərazi bütövlüyünü və suverenliyini bərpa etdi. Ancaq sülh müqaviləsini bağlamaq mümkün olmadı. İnşallah İlham Əliyev Azərbaycan xalqının dəstəyi ilə bu prosesin də icrasına nail olacaq".

"Biz Azərbaycanın həmişə yanında olacağıq, Azərbaycanın sabitlik içərisində olması heç kimi narahat etməməlidir. Regionun 6 ölkəsi normal münasibətlərə malik olmalıdırlar. İllərdir bu coğrafiyada qan tökülür, inşallah bundan sonra İlham Əliyev xalqdan aldığı dəstəklə ölkəsini ən gözəl sabahlara aparacaq. İlham Əliyevi təbrik edir, Azərbaycan xalqını isə bu seçiminə görə alqışlayırıq".

Qeyd edək ki, fevralın 7-də Azərbaycanda növbədənkənar prezident seçkiləri keçirilib. Mərkəzi Seçki Komissiyasının (MSK) son açıqlamasına görə, məntəqələrdən bülletenlərin 93,3 faizinin nəticəsi təqdim edilib. Seçki bülletenlərinin sayı 4 659 967, səs vermiş seçicilərin sayı isə 4 660 025-dir.

Azərbaycanın hazırkı Prezidenti İlham Əliyev səslərin 92,05% faizini qazanmaqla növbədənkənar prezident seçkilərində liderlik edir.