“Heydər Əliyev İli” çərçivəsində XII Azərbaycan Beynəlxalq Geofizika Konfransı keçirilir

Bakıda “Heydər Əliyev İli” çərçivəsində Azərbaycan Dövlət Neft Şirkətinin (SOCAR) Geofizika və Geologiya İdarəsinin təşkilatçılığı ilə XII Azərbaycan Beynəlxalq Geofizika Konfransı öz işinə başlayıb.

“Report”un SOCAR-a istinadən verdiyi məlumata görə, tədbir çərçivəsində Ulu Öndər Heydər Əliyevin 100 illik yubileyinə həsr olunmuş sərgi nümayiş etdirilib.

SOCAR-ın Geofizika və Geologiya İdarəsinin rəisi Elçin Şirinov Ümummilli Lider Heydər Əliyevin zəngin və mənalı həyat yolundan bəhs edib, Ulu Öndərin ölkəmizin neft sənayesinin inkişafı istiqamətindəki misilsiz xidmətləri barədə məlumat verib.

Sonra Ulu Öndərin müəllifi olduğu Azərbaycanın enerji strategiyasından bəhs edən videoçarx nümayiş olunub.

Konfransda çıxış edən SOCAR-ın baş geoloqu Arzu Cavadova Azərbaycanın kəşf olunmamış karbohidrogen ehtiyatlarının mövcudluğuna, mövcud yataqların hələ açılmamış məhsuldar qatlarının potensialının qiymətləndirilməsi imkanlarına toxunub.

Aprelin 28-nə qədər davam edəcək konfransda “Xəzər regionu və oxşar geoloji əyalətlərdə karbohidrogen resurslarının mənimsənilməsində geofiziki tədqiqatların rolu” mövzusunda 47 şifahi, 37 stend mühazirələrinin keçirilməsi nəzərdə tutulub.