Cəlilabadda magistral yolda hərəkət bərpa edilib - YENİLƏNİB-2

Cəlilabadda magistral yolda hərəkət bərpa edilib.

Bu barədə "Report"un Muğan bürosunun sorğusuna cavab olaraq DİN-in Mətbuat xidmətinin Lənkəran regional qrupunun baş inspektoru, polis kapitanı Məhəmməd Rzayev bildirib.

Onun sözlərinə görə, yolun köhnə Ələt-Astara avtomobil yolunun Göytəpə şəhərindən keçən hissəsində hərəkətin təhlükəsizliyi polis əməkdaşları və aidiyyəti qurumlar tərəfindən təmin olunub. Hər iki  istiqamətdə nəqliyyatın hərəkəti bərpa olunub.

Qeyd edək ki, Cəlilabad rayonunda güclü külək ağacları magistral yola aşırdığından hərəkət məhdudlaşdırılmışdı.

Cəlilabadda güclü küləyin fəsadları aradan qaldırılır. 

"Report"un Muğan bürosunun məlumatına görə, rayon ərazisində baş verən qəfil külək nəticəsində elektrik xətləri qırılıb, rayon mərkəzi də daxil olmaqla, bir neçə kənd işıqsız qalıb.

Həmçinin güclü külək onlarla ağacı aşırıb. Külək köhnə Ələt-Astara avtomobil yolunun Göytəpə şəhərindən keçən hissəsində ağacları yola aşırıb. Eyni zamanda şəhər ərazisində fərdi evlərin və obyektlərin dam örtüyü dağılıb, işıqlar kəsilib. 

Leysan yağışı Rayon Mərkəzi Xəstəxanasına da ziyan vurub. Yağış suları xəstəxananın infeksion korpusuna dolub.

Hazırda rayon fövqəladə hallar komissiyası və digər dövlət orqanları təbii fəlakətin aradan qaldırılması istiqamətində işlər aparır. Cəlilabad şəhərinin bir hissəsində elektrik enerjisinin verilişi bərpa olunub. İlkin məlumata görə, insan tələfatı yoxdur. 

Əlavə məlumat veriləcək.

Cəlilabadda güclü külək fəsadlar törədib, bəzi əraziləri işıqsız qoyub.

"Report"un Muğan bürosunun məlumatına görə, yağan leysan və güclü külək rayon mərkəzində və bir neçə kənddə elektrik enerjisinin kəsilməsinə səbəb olub.

Şəhərin mərkəzində ağaclar aşıb.

Hazırda rayon ərazisində küləyin törətdiyi problemlər aradan qaldırılır.