Azərbaycan sahibkarlarının Cənubi Koreyaya alıcı missiyası təşkil olunacaq

Azərbaycan İqtisadiyyat Nazirliyi martın 11-16-ı tarixlərində İxracın və İnvestisiyaların Təşviqi Agentliyi (AZPROMO) tərəfindən Cənubi Koreyaya təşkil olunacaq alıcı missiyasında iştirak etmək üçün ixracatçıların müraciətlərinin qəbulunu elan edir.

“Birxeber.Az” bu barədə AZPROMO-ya istinadən xəbər verir.

Belə ki, ixracatçıların maksimum sayı 15 nəfər nəzərdə tutulub.

Alıcı missiyasının əhatə etdiyi hədəf məhsullar, qida, içki və sənaye sahələridir.

Alıcı missiyasında iştirak edəcək ixracatçılar AZPROMO tərəfindən təşkil olunacaq müsabiqə əsasında seçiləcək.

Müsabiqə Azərbaycan Respublikası Nazirlər Kabinetinin 2018-ci il 31 oktyabr tarixli 470 nömrəli Qərarı ilə təsdiq edilmiş "Dəstək tədbirlərində iştirak edəcək ixracatçıların seçilməsi üçün müsabiqənin təşkili və keçirilmə Qaydası" əsasında fevralın 5-də AZPROMO-da təşkil olunacaq.

Alıcı missiyasında iştirak etmək üçün AZPROMO-ya aşağıdakı sənədlər təqdim edilməlidir:

Ərizə;

Dəstək tədbirində iştirakla bağlı şərtlər;

Sahibkarın istehsal və ixrac potensialı və əvvəllər ixrac təcrübəsinin olmasına dair sənədlər və ya məlumatlar;

Son birillik dövriyyə və vergi borcu barədə vergi orqanından alınmış arayış və ya arayışlar;

Bank hesabından çıxarış (ərizənin təqdim olunduğu əvvəlki 365 gün ərzində həyata keçirilmiş əməliyyatlar göstərilməklə).