Lerikdə istirahət mərkəzində güclü yanğın olub - TƏFƏRRÜAT - YENİLƏNİB

Lənkəran-Lerik yoyulun Sivəkəran kəndi ərazisində yerləşən “Təbəssüm” istirahət mərkəzində yanğın hadisəsi, ilkin məlumata görə, gecə saat 3 radələrində başlayıb.

“Birxeber.Az”un cənub bürosunun məlumatına görə, yanğından təxminən yarım saat sonra hadisə barədə FHN-in Yanğından Mühafizə hissəsinə məlumat verilib.

Hadisə yerinə 3 yanğınsöndürən texnika və canlı qüvvə cəlb olunub. Ümumilikdə, taxta konstruksiyalı ikimərtəbəli 2 kottec, digər ikisində tavan və dam örtükləri və əsas xidməti binanın mətbəx hissəsi, ümumilikdə 410 kvadratmetr sahə tam olaraq yanıb. Yanğının digər kotteclərə və meşə ərazisinə keçməsinin qarşısı alınıb. Xəsarət barədə məlumat yoxdur.

Yanğın səhər saat 6:30-da lokallaşdırılıb. Onun mətbəxdə qısaqapanmadan baş verdiyi ehtimal edilir.

Faktla bağlı araşdırma aparılır.

Lerik rayonunun Sivəkəran kəndində yerləşən istirahət mərkəzində yanğın olub.

Bu barədə "Birxeber.Az"un sorğusuna cavab olaraq Fövqəladə Hallar Nazirliyinin (FHN) Mətbuat xidmətindən məlumat verilib.

Bildirilib ki, istirahət mərkəzinin ərazisində hər birinin sahəsi 144 m² olan 2 ədəd ikimərtəbəli yeməkxana binasının yanar konstruksiyaları, içərisində olan avadanlıqlar, yaxınlıqda bir-birinə bitişik, ümumi sahəsi 120 m² olan 3 ədəd kotteclərdən sahəsi 34 m² olan bir kottecin yanar konstruksiyaları və digər iki kottecin dam örtüyü yanıb. Kotteclərin qalan hissəsi və meşə zolağı yanğından mühafizə olunub.

Yanğın yanğından mühafizə bölmələri tərəfindən söndürülüb.