Ursula von der Leyen: Çinin Rusiyaya qarşı bütün təsir imkanlarından istifadə edəcəyinə ümid edirik

"Fikir ayrılığı olan məsələlərdə açıq və səmimi fikir mübadiləmiz oldu".

APA xəbər verir ki, bunu Avropa Komissiyasının Prezidenti Ursula von der Leyen Parisdə Aİ, Fransa və Çin rəhbərlərinin üçtərəfli görüşünün yekununa dair mətbuata açıqlamasında deyib.

O bildirib ki, müzakirələr zamanı geosiyasi vəziyyət, Aİ və Çin arasında iqtisadi tərəfdaşlıq və iqlim məsələsi gündəmdə olub.

"Biz Rusiyanın Ukraynaya qarşı işğalçılıq müharibəsini dayandırmaq üçün Çinin Rusiyaya qarşı bütün təsir imkanlarından istifadə edəcəyinə ümid edirik. Prezident Si Cinpin Rusiyanın məsuliyyətsiz nüvə təhdidlərinin aradan qaldırılmasında mühüm rol oynayıb və mən əminəm ki, Rusiya tərəfindən davam edən nüvə təhlükələri fonunda prezident Si Cinpin bunu davam etdirəcək.

Biz həmçinin Çinin Rusiyaya heç bir ölümcül silahlar verməməsi ilə bağlı öhdəliyini müzakirə etdik. İkili məqsəd üçün istifadə edilən malların Rusiyaya çatdırılmasının qarşısını almaq üçün daha çox səy göstərmək lazımdır", - Avropa Komissiyasının Prezidenti vurğulayıb.

O əlavə edib ki, tərəflər İranın Yaxın Şərqdəki rolu barədə də fikir mübadiləsi aparıblar: "Biz həmçinin İranın Yaxın Şərqdə stabilliyə birbaşa təhdid olduğunu müzakirə etdik və biz inanırıq ki, Çin İranın regionda məsuliyyətsiz addımların məhdudlaşdırılmasında vacib rol oynaya bilər".