ABŞ-ın hərbi texnikası olan gəmi Yunanıstan limanına çatıb

İçərisində hərbi texnika olan Amerikanın “Liberty Pride” yük gəmisi Yunanıstanın şimalındakı Aleksandrupolis limanına çatıb.

“Birxeber.Az” xəbər verir ki, bu barədə Yunanıstanın sol qüvvələrinin 902.gr informasiya portalı məlumat yayıb.

Qeyd olunub ki, Aleksandrupolisdə boşaldılan hərbi texnika NATO-ya məxsusdur və yaxın gələcəkdə alyansın böyük hərbi təlimlərinin keçiriləcəyi Bolqarıstan və Rumıniyaya veriləcək.

200 metrlik yük gəmisi Amerikanın Çarlston limanından Aleksandrupolisə gəlib və gələn həftənin ortalarında yola düşəcək. “Liberty Pride” Cənub-Şərqi Avropada NATO qoşunlarının təchizat zəncirinin aparıcı halqasıdır və bu prosesin avqustun sonuna qədər davam edəcəyi gözlənilir.

Bir neçə gün əvvəl Amerika ordusunun 200-dən çox zabiti və mülki şəxsi hərbi texnikanın daşınması üçün Aleksandrupolisə gəlib.