Audiovizual Şuranın 2023-cü il üzrə gəlir və xərcləri açıqlanıb

Audiovizual Şuraya hesabat ilində illik plana əsasən, dövlət büdcəsindən 2 milyon 654.037,00 (iki milyon altı yüz əlli dörd min otuz yeddi manat), nəqliyyat vasitələrinin icbari sığortası üçün 1.021,10 (bir min iyirmi bir manat on qəpik), yeni xidməti minik avtomobilinin alınması üçün isə əlavə olaraq 57.800,00 (əlli yeddi min səkkiz yüz manat), ümumilikdə 2.712.858,10 (iki milyon yeddi yüz on iki min səkkiz yüz əlli səkkiz manat on qəpik) vəsait ayrılmışdır. İl ərzində bu vəsaitdən 2.281.120,10 (iki milyon iki yüz səksən bir min yüz iyirmi manat on qəpik) maliyyələşdirilmiş, 2.231.048,36 (iki milyon iki yüz otuz bir min qırx səkkiz manat otuz altı qəpik) vəsait isə istifadə olunmuşdur. İlin sonunda Maliyyə Nazirliyi tərəfindən ilkin plana dəqiqləşdirmə verilmiş və dəqiqləşdirilmiş büdcə 2.231.048,36 (iki milyon iki yüz otuz bir min qırx səkkiz manat otuz altı qəpik) olmuşdur. Maliyyələşdirilmiş vəsaitdən istifadə olunmayan 50.071,74 (əlli min yetmiş bir manat yetmiş dörd qəpik) vəsait isə dövlət büdcəsinə qaytarılmışdır.

Dövlət büdcəsindən ayrılmış vəsaitə və işçilərin say həddinə uyğun ştat cədvəli tərtib edilərək Maliyyə Nazirliyinə təqdim olunmuşdur. Müvafiq olaraq hər ayın əvvəlində tələbata və verilmiş limitə uyğun xərc maddələri üzrə Maliyyə Nazirliyinə sifariş, xəzinələrarası köçürmə sərəncamı, məxaric cədvəlləri təqdim olunmuş və açılmış kreditdən istifadə olunmuşdur.

Audiovizual Şura tərəfindən 19 iyun–02 avqust 2023-cü il tarixlərində keçirilmiş müsabiqə üzrə cəmi 100,00 (bir yüz) manat büdcədənkənar vəsait daxil olmuş və bu vəsait müsabiqə ilə bağlı məlumatların mətbuatda dərc olunmasına sərf olunmuşdur. Bundan başqa cari ildə verilmiş lisenziyalardan Şuranın xəzinə hesabına ümumilikdə 45.500,00 (qırx beş min beş yüz) manat büdcədənkənar vəsait daxil olmuş və bu vəsaitin dövlət büdcəsinə köçürülməsi təmin edilmişdir.

2023-cü ilin yanvar ayından etibarən Maliyyə Nazirliyinin Dövlət Xəzinədarlığı Agentliyi tərəfindən növbəti ayın maliyyələşməsi açıldıqdan sonra malların (iş və xidmətlərin) alışı sənədi, kassa xərclərinin sifarişi və ödəniş tapşırıqları lazımi xərclərə və tələbata uyğun olaraq Xəzinədarlıq İdarəsinə təqdim olunmuşdur.

Hər ay təsdiq olunmuş ştat cədvəlinə, iş vaxtının uçot tabelinə və əmək haqqı cədvəlinə əsasən, işçilərə əmək haqqı və digər sosial ödənişlər vaxtında ödənilmişdir. Ştatdankənar işçilərlə (ekspert qrupu) bağlanmış müqaviləyə uyğun olaraq aylıq əməkhaqqı ödənişləri vaxtında həyata keçirilmişdir. Əmək haqqından tutulmuş üzvlük haqqı Həmkarlar İttifaqları Konfederasiyasına, həmçinin digər məcburi ödənişlər (Dövlət Sosial Müdafiə Fondu, işsizlikdən sığorta haqqı, icbari tibbi sığorta, gəlir vergisi) də vaxtında hesablanaraq ödənilmişdir. Xərc maddələri üzrə: inzibati binanın icarəsi, rabitə xərcləri, işıq, qaz və sudan istifadəyə görə ödəniş, poçt, bank xidmətlərinə görə ödənişlər vaxtında və tam şəkildə həyata keçirilmişdir. Hesabat ilində limitə uyğun lazımi dəftərxana ləvazimatları, təsərrüfat malları, texniki vəsitələr və avadanlıqlar alınaraq istismara verilmişdir.

Aylıq hesabatlar Audiovizual Şura tərəfindən Azərbaycan Respublikası Dövlət Statistika Komitəsinə, rüblük hesabatlar Azərbaycan Respublikası Hesablama Palatasına, Dövlət Vergi Xidmətinin Milli Gəlirlər Baş İdarəsinə, illik hesabatlar Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətinə təqdim edilmişdir. “İctimai Sektor üçün Mühasibat Uçotunun Beynəlxalq Standartları”na uyğun hesabatlar isə müvafiq formalara uyğun Azərbaycan Respublikası Maliyyə Nazirliyinə və Azərbaycan Respublikası Hesablama Palatasına təqdim olunmuşdur.

Azərbaycan Respublikası Audiovizual Şurası sədrinin 01 noyabr 2023-ci il tarixli 011/S saylı Sərəncamına əsasən, əmlakın inventarlaşdırılması məqsədi ilə yaradılmış komissiya tərəfindən 30.12.2023-cü il tarixinə mal-materialın, əmlakın (qiymətlilərin) inventarizasiyası aparılmışdır. Köhnəlmiş, istifadəyə yararsız inventarların, mal-materialların və əmlakın (qiymətlilərin) ləğvi aktı tərtib olunmuşdur.

Audiovizual Şuranın 2023-cü ildə xərc maddələri üzrə maliyyələşmə və faktiki xərcləri əlavə cədvəldə təqdim olunur.