Almaniya Qəzzada UNRWA ilə əməkdaşlığını bərpa edir

Almaniya hökuməti Qəzzada BMT-nin Yaxın Şərqdəki Fələstinli Qaçqınlara Yardım və İşlər üzrə Agentliyi ilə əməkdaşlığı bərpa etməyi planlaşdırır.
APA xəbər verir ki, bu barədə Almaniyanın Xarici İşlər və İnkişaf Nazirliklərinin birgə bəyanatında deyilir.
Bu qərar Fransanın keçmiş xarici işlər naziri Katerin Kolonna tərəfindən UNRWA-nın bəzi əməkdaşlarının HAMAS-ın 7 oktyabr hücumunda iştirak edib-etməməsi ilə bağlı araşdırmasından sonra verilib.

UNRWA-nın neytrallığına dair aparılan araşdırmanın nəticəsi ondan ibarət olub ki, İsrail UNRWA-nın yüzlərlə əməkdaşının "Qəzzada terror qruplaşmalarında əməliyyatçı olması ilə bağlı ittihamlarını hələ də sübut etməyib".
Almaniya UNRWA-nı daxili audit funksiyasını gücləndirmək və layihənin idarə edilməsinə kənar nəzarəti təkmilləşdirmək də daxil olmaqla hesabatın tövsiyələrini tez bir zamanda həyata keçirməyə çağırıb.
"Bu islahatları dəstəkləmək üçün Almaniya hökuməti Avstraliya, Kanada, İsveç və Yaponiya kimi Qəzzada UNRWA ilə əməkdaşlığını tezliklə davam etdirəcək", bəyanatda qeyd olunub.