Türkiyədəki zəlzələ Azərbaycandakı pərakəndə geyim və onlayn ticarət bazarına necə təsir edəcək?

“Güclü zəlzələ baş verən Malatya, Kahramanmaraş şəhərlərində iri şirkətlərin istehsal fabrikləri yerləşir. Bu səbəbdən də, zəlzələnin əraziyə vurduğu ziyan və ümumi vəziyyəti nəzərə alsaq, növbəti, yəni payız-qış mövsümündə tekstil malların qiymətində artım gözlənilir”.

Bunu “Birxeber.Az”a açıqlamasında fervalın 6-da Türkiyənin bir sıra regionlarında baş verən 7,7 və 7,6 maqnitudalı iki zəlzələnin Azərbaycanın geyim bazarına təsirini şərh edən Azərbaycan Pərakəndə Geyim İdxalçıları Assosiasiyasının (AFRA) İdarə Heyətinin sədri Fərid Novruzi deyib.

F.Novruzi hesab edir ki, 2023-cü ilin ilk yarısında qiymət artımı ilə bağlı yenilik gözlənilmir:

“Növbəti 6 ay ərzində yəni qarşıdan gələn yaz-yay mövsümündə tekstil mallarına müəyyən olunan qiymətlərdə dəyişikliklər olmayacaq, çünki sahənin qaydalarına uyğun olaraq, bu mövsüm üçün nəzərdə tutulan malların istehsalı prosesi artıq bitib. Qeyd olunan mövsümlərdə yalnız logistika məsələləri ilə bağlı problemlərin olması gözlənilir ki, bu da tədarük zəncirində qırılmaların baş verməsi səbəbindən ola bilər”.

"Azərbaycan İnformasiya və Kommunikasiya Texnologiyaları Sənayesi Assosiasiyası" (AİKTSA) İctimai Birliyinin İdarə Heyətinin sədri Elvin Abbasov isə hesab edir ki, brend malların istehsalçıları hadisədən təsirlənsə də qısa müddət üçün qiymət artımına getməyəcək:

“Türkiyə elektron ticarət platformaları Azərbaycanda kifayət qədər məşhurdur. Bu baxımdan qardaş ölkədə baş verən zəlzələnin onlayn satışa təsiri bizim ölkəmizdə də hiss ediləcək. Biz də bu prosesi dərindən müşahidə edirik. Düşünürəm ki, brendlər öz adlarını qorumaq naminə zərər dəyməsinə baxmayaraq bahalaşmaya getməyəcəklər.

Zəlzələnin qiymətlərə təsirinə gəlincə bu əsasən ölkə daxilində xüsusən də təbii fəlakət baş verən bölgədə istehsal edilən məhsullarda müşahidə edilə bilər. Təbii ki, zəlzələnin nəticələrinin hansı müddətdə aradan qaldırılması, həmin bölgələrdəki müəssisələrin öz işlərini hansı tezlikdə bərpa etməsi, ölkədaxili daşınmaların opertativliyinin təmini və başqa bu kimi məsələlər qiymətlərə təsir etməsi mümkündür”.

Xatırladaq ki, fevralın 6-da ocağı Türkiyənin Kahramanmaraş şəhərinin Pazarcık rayonunda olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ olub.

Güclü yeraltı təkanlardan sonra bölgədə 6,6 maqnitudayadək 4 700-dən çox afterşok qeydə alınıb. İki zəlzələ həmçinin Livan, Kipr, İraq, İsrail, İordaniya, İran və Misirdə hiss edilib.

Təbii fəlakət Türkiyə və Suriyada böyük dağıntı və onminlərlə itkiyə səbəb olub. Son məlumatlara görə, zəlzələ nəticəsində Türkiyədə 38 044 nəfər dünyasını dəyişib.

Türkiyədə zəlzələ bölgəsində 61 722 bina yaşayış üçün tamamilə yararsız olduğu üçün söküləcək.

Türkiyənin zəlzələ baş verən 10 şəhərində 3 aylıq fövqəladə vəziyyət elan olunub. Bu hadisə Türkiyədə 1939-cu ildən bəri qeydə alınan ən güclü zəlzələ kimi tarixə düşüb. Zəlzələdən dərhal sonra Azərbaycanda qardaş ölkə üçün yardım toplanmasına başlanılıb.