Türkiyədə zəlzələdə həlak olan Şahin Vəliyevlə Gəncədə vida mərasimi keçirilir

Türkiyədə baş verən dəhşətli zəlzələdə həlak olan azərbaycanlı tələbə Şahin Vəliyev ilə Gəncə şəhər Cavadxan qəsəbəsində vida mərasimi keçirilir.

"Birxeber.Az"un Qərb bürosunun məlumatına görə, mərasimdə mərhumun ailə üzvləri, yaxın qohumları, ictimaiyyət nümayəndələri və qəsəbə sakinləri iştirak edirlər.

Daha sonra mərhum Gəncə şəhər Şəhidlər xiyabanında dəfn olunacaq.

Xatırladaq ki, Malatya şəhərindəki İnönü Universitetində təhsil alan azərbaycanlı tələbələrin meyitləri uzunmüddətli axtarışdan sonra fevralın 14-də tapılıb.

Qeyd edək ki, fevralın 6-da ocağı Türkiyənin Kahramanmaraş şəhərinin Pazarcık rayonu olan 7,7 maqnitudalı və 9 saat sonra episentri eyni şəhərin Elbistan rayonu olan 7,6 maqnitudalı iki zəlzələ olub. Güclü yeraltı təkanlardan sonra bölgədə 6,6 maqnitudayadək yüzlərlə afterşoklar qeydə alınıb.

Təbii fəlakət nəticəsində Türkiyədə azı 35 418 nəfər ölüb.