Macarıstan çempionu olan azərbaycanlı voleybolçu: Nailiyyətlər asan əldə olunmur

Əlbəttə, bütün bunlar heç də asan başa gəlmədi, müəyyən çətinliklərlə, zədələrlə üzləşdik.

Bunu "Birxeber.Az"a açıqlamasında “Vaşaş” klubu ilə növbəti dəfə Macarıstan çempionu olan Azərbaycan millisinin voleybolçusu Ayşən Abduləzimova deyib.

Oyunçu bu il komanda olaraq qarşılarına qoyduqları hədəflərə nail olduqlarını bildirib: "Növbəti dəfə Macarıstan çempionatını və ölkə kubokunu qazandıq. Keçən il olduğu kimi, bu il də liqada və kubokda bütün matçlarda qalib gəldik və tarix yazdıq. Düşünürəm ki, avrokubokda çıxışımız da uğurlu alındı, qrup mərhələsini keçməklə Macarıstan voleybol tarixində bir ilkə imza atdıq. Baş məşqçinin bütün tapşırıqlarını yerinə yetirmək üçün əlimizdən gələni etdik. Çox şükür, məqsədimizə nail olduq".

Abduləzimova dördüncü dəfə Macarıstan çempionu olduğunu xatırladıb: "Həm də kuboku dördüncü dəfə əldə etdik. Bunun üçün də çox şadam. Artıq klub mövsümünü başa vurdum. Keçən ildən zədələrim var. Avropa çempionatından dərhal sonra klubla məşqlərə başladım, mövsüm boyu da zədəm müəyyən qədər oyunuma təsir etdi. Həkimlərin də köməyi ilə daha yaxşı oynamağa çalışdım. İndi bir qədər istirahət edib, sonra yenidən zədələrimin müalicəsi ilə məşğul olacağam".

Təcrübəli voleybolçu Azərbaycan millisi və çempionatı barədə də danışıb: "Bu turniri boş vaxtım olanda izləyirəm. Əvvəlki illərlə müqayisədə bu il liqamız daha güclü və maraqlı keçir. Pley-off mərhələsinə də imkan tapdıqca baxıram. Açığı, hansı komandanın çempion olacağı da bəlli deyil, hər bir komandanın şansı böyükdür. Yığma ilə hər zaman olduğu kimi Qızıl Avropa Liqasında yaxşı mübarizə aparmağa və uğurlu nəticə əldə etməyə çalışacağıq".