AZAL Bakıdan Buxarestə uçuşlara başlayacaq

"Azərbaycan Hava Yolları" QSC (AZAL) bu il iyunun 3-dən Rumıniyanın paytaxtı Buxarestə müntəzəm reyslərə başlayacaq.

"Report" AZAL-a istinadən xəbər verir ki , uçuşlar həftədə iki dəfə — bazar ertəsi və cümə axşamları həyata keçiriləcək.

AZAL-ın Buxarestə reyslərinin açılması Azərbaycan və Rumıniya arasında əlaqələrin inkişafına, həmçinin turizm, mədəniyyət və biznes imkanlarının genişlənməsinə töhfə verəcək.

Buxarest Rumıniyanın paytaxtı və ən böyük şəhəri olmaqla yanaşı, ölkənin mühüm iqtisadi və mədəni mərkəzidir, eyni zamanda Cənub-Şərqi Avropanın maraqlı şəhərlərindən biridir.

Yaxın gələcəkdə aviaşirkət Şərqi Avropanın daha bir böyük şəhərinə — Bolqarıstanın paytaxtı Sofiyaya uçuşları bərpa etməyi planlaşdırır. Bu istiqamətdə də reyslər həftədə iki dəfə yerinə yetiriləcək.

Aviaşirkətin www.azal.az rəsmi internet saytı və ya AZAL mobil tətbiqi vasitəsilə uçuş cədvəli ilə tanış ola və aviabiletləri əldə edə bilərsiniz.