Fransada binada partlayış və yanğın olub, ölənlər var

Fransanın paytaxtı Parisin şərqində doqquz mərtəbəli binanın səkkizinci mərtəbəsində baş verən partlayış və ardınca yanğın zamanı azı 3 nəfər həlak olub.

"Birxeber.Az"un məlumatına görə, bu barədə "Le Parisien" qəzeti xəbər yayıb.

Hadisə bazar günü axşam saatlarında şəhərin XI dairəsində Şaron küçəsində baş verib. Yerli sakinlər partlayış səsi eşitdiklərini bildiriblər, lakin ərazi administrasiyası rəhbərinin müavini Luk Lebonun nəşrə verdiyi məlumata görə, binada qaz avadanlığı yoxdur, ona görə də onun xarakteri hələ müəyyən edilməyib.

Yanğın baş verən mənzildə xilasedicilər iki nəfərin meyitini aşkar ediblər. Daha bir nəfər təşvişə düşüb və mənzilinin pəncərəsindən yerə atılıb. Həkimlər ona tibbi yardım göstərsələr də, aldığı xəsarətlərdən hadisə yerində keçinib.

Fövqəladə hallar xidmətinin əməkdaşları sakinləri təxliyə edib, yaxın iki saat ərzində onlar öz evlərinə qayıda biləcəklər, hakimiyyət lazım gələrsə, qəzalı vəziyyətdə olan səkkizinci mərtəbənin sakinləri üçün gecələmək üçün yerlər təşkil etməyə hazırdır.