Azərbaycan Basketbol Federasiyasının rəsmisi: Qazanılan nəticələr bizi sevindirməyə bilməz

Tailandda keçirdiyimiz oyunlar Honkonqda rellaşacaq turnirə hazırlıq məqsədi daşıyırdı. Təbii ki, qazanılan nəticələr bizi sevindirməyə bilməz.

Bunu “Birxeber.Az”a açıqlamasında Azərbaycan Basketbol Federasiyasının (ABF) baş katibi Vüqar Əzimov deyib.

ABF rəsmisi qadınlardan ibarət 3x3 basketbol millimizin Tailandda keçirilən beynəlxalq turnirdə ikinci yeri tutmasını dəyərləndirib: "Finala çıxmaq bir o qədər önəmli deyildi. Qarşılaşmalar hazırlıq xarakterli idi”.

Baş katib Honkonqda keçiriləcək təsnifat turnirində uğurlu çıxış edərək, Paris-2024 Yay Olimpiya Oyunlarına lisenziya qazanmaq istədiklərini söyləyib: “Həmin yarışda birinci pilləni tutmaq istəyirik. Basketbolçularımıza ümidlər böyükdür. Özüm də komanda üzvləri ilə mütəmadi danışıram, ab-hava yüksək səviyyədədir. Yığmamızda təcrübəli oyunçular çoxluq təşkil edir".

Qeyd edək ki, Azərbaycan millisi aprelin 8-də Tailanddan Honkonqa yola düşəcək. Təsnifat turnirinin oyunları isə aprelin 12-14-də baş tutacaq. Yığmamız Niderland, Monqolustan və Çili ilə üz-üzə gələcək.