DSX-nin Akademiyasında 20 Yanvar faciəsinin 33-cü ildönümü ilə əlaqədar tədbir keçirilib

Yanvar ayının 17-də Dövlət Sərhəd Xidməti Akademiyasında 20 Yanvar faciəsinin 33-cü ildönümü ilə əlaqədar tədbir keçirilib.

Bu barədə "Birxeber.Az"a DSX-nın Mətbuat Xidmətindən məlumat verilib.

Dövlət Himninin səsləndirilməsi ilə başlayan tədbirdə Azərbaycanın azadlığı, müstəqilliyi yolunda həyatlarını qurban vermiş, xalqımızın qürur mənbəyinə çevrilən şəhidlərin əziz xatirəsi bir dəqiqəlik sükutla yad edilib.

Tədbirdə çıxış edənlər SSRİ rəhbərliyinin göstərişi ilə 1990-cı ilin yanvar ayının 19-dan 20-nə keçən gecə törədilmiş dəhşətli cinayətin Azərbaycan xalqının müstəqillik uğrunda mübarizə əzmini qıra bilmədiyini, həmin tarixi gecədə Azərbaycan xalqının özünün yenilməzliyini, qəhrəmanlığını, Vətənə, torpağa sədaqətini, azadlıq uğrunda mübarizəsini bütün dünyaya bir daha bəyan etdiyini bildiriblər.

Qanlı faciədən dərhal sonra Ulu Öndər Heydər Əliyevin Azərbaycanın Moskvadakı daimi nümayəndəliyində təcavüzə cəsarətlə etiraz bildirməsi, qanlı faciənin təşkilatçılarını dünya ictimaiyyəti qarşısında ittiham etməsi xüsusi vurğulanıb.

Sonda tədbir Şuşa Dövlət Musiqili Dram Teatrının yaradıcı kollektivi tərəfindən “Yanvarın 20-ci günü” adlı ədəbi-bədii kompozisiya nümayiş etdirilib.