Azərbaycan Minifutbol Federasiyasının baş katibi: Avropa çempionatındakı rəqiblər "dişimizə görə"dir

Rəqiblər "dişimizə görə"dir.

Bunu "Report"a açıqlamasında Azərbaycan Minifutbol Federasiyasının baş katibi Orxan Hüseynov yığmanın Bosniya və Herseqovinanın paytaxtı Sarayevoda keçiriləcək Avropa çempionatındakı rəqibləri barədə danışarkən deyib.

Federasiya rəsmisi püşkü qənaətbəxş hesab edib: "Daha çətin qrupa düşə bilərdik. İkinci səbətdə Serbiya, Çexiya və Macarıstan kimi daha güclü yığmalar var idi. Amma bizə Fransa düşdü. Bu kollektivlə ötən ilin mayında Bakıda təşkil etdiyimiz turnirdə qarşılaşmışdıq. Pley-offda 3:2 hesabı ilə qalib gəlmişdik. Yaxşı və texnikalı komandadır. Ölkəmizdəki yarışa 1-2 əsas oyunçuları gələ bilməmişdi. Son dünya çempionatında da yaxşı mübarizə aparmışdılar. 1/8 finala vəsiqə qazana bilməsələr də, mübariz komanda olduqlarını gördük. Fərdi oyuna daha çox üstünlük verirlər. İtaliya ilə də ölkəmizdəki turnirdə oynamışdıq. Eyni qrupda idik və 2:0 hesabı ilə qalib gəlmişdik. Onların oyunçularının əksəriyyətinin futzal karyerası var. Avstriya millisi barədə isə geniş məlumatım yoxdur".

O.Hüseynov Serbiya, Bolqarıstan və Gürcüstanın yer aldığı E qrupunu "ölüm qrupu" adlandırıb: "Onlar öz səbətlərində ən güclü yığmalardan biridir. Bizim qrupdan növbəti mərhələyə vəsiqə qazananlar oradakı 1-2-ci yerin sahibləri ilə üz-üzə gələcəklər".

Qeyd edək ki, Avropa çempionatı iyunun 1-dən 9-na qədər Sarayevo şəhərində baş tutacaq. Yarışın mükafatları uğrunda 24 komanda mübarizə aparacaq.