2022-ci ildə Energetika Nazirliyinə 6 700-dən çox müraciət daxil olub

2022-ci il ərzində Energetika Nazirliyi və tabeli qurumlara 6 733 vətəndaş müraciəti daxil olub.

“Birxeber.Az”un nazirliyə istinadən verdiyi məlumata görə, müraciətlərdən 5 740-ı müvafiq qaydada icra olunub, 392-si icradadır. 601 müraciət isə məlumat xarakterlidir.

Müraciətlər əsasən elektrik enerjisi və təbii qaz təchizatı, elektrik enerjisi şəbəkəsinə qoşulma və texniki şərtin verilməsi, elektrik qurğu və avadanlıqlarının vəziyyəti, borc və cərimələr, sayğaclaşma, bərpa olunan enerji, icazələr, işlə təminat, təşəkkür və digər mövzularla bağlı olub.

Hesabat dövründə Nazirlik və tabeli qurumların rəhbər vəzifəli şəxsləri tərəfindən 254 vətəndaş qəbul edilib və müraciətlərdə qaldırılan məsələlərin qanunvericiliyin tələblərinə uyğun həll edilməsi üçün müvafiq tapşırıqlar verilib.