Maksim Medvedev: Karyeramın sonu yaxınlaşır

Karyeramın sonu yaxınlaşır.

“Report”un məlumatına görə, bunu “Qarabağ”ın futbolçusu Maksim Medvedev “metaratings.ru” saytına müsahibəsində deyib.

Kapitan karyerasını bitirdikdən sonra da bu sahədə qalmağı planlaşdırdığını bildirib: “Futbolda qalmaq, biliklərimi yeni nəsillərə ötürmək istərdim. Gənclərlə ünsiyyət qururam, onlara doğru yolu göstərirəm, stresdən necə çıxmalı olduqlarını izah edirəm. Komandada qalmaq istərdim, amma seçim etməliyəm. Çünki karyeram bitdikdən sonra məşğul olmaq istədiyim çoxlu sahələr var”.

34 yaşlı müdafiəçi çalışa biləcəyi vəzifələri sadalayıb: “Çoxları deyir ki, idman direktoru, məşqçi ola və ya akademiyada işləyə bilərəm. Amma bu gün hansının daha yaxşı olduğunu dəqiq bilmirəm. Minimumdan maksimum yararlanan məşqçi ilə işləyirəm və onun işini öz gözlərimlə görürəm. Məşqçilik kateqoriyam yoxdur, amma bilik baxımından özümü ilkin kateqoriyalara yaxın hiss edirəm”.

Qeyd edək ki, “Qarabağ”ın yetirməsi olan Maksim Medvedev 2006-cı ildən əsas komandada çıxış edir.