İspaniya 2029-cu ilə qədər NATO-nun öhdəliklərini icra edə bilməyəcək

İspaniya 2029-cu ilə qədər NATO-nun öhdəliklərini icra edə bilməyəcək.

Birxeber.Az-nın məlumatına görə, bu barədə yerli "El País" qəzeti xəbər yayıb. Yazıda bildirilir ki, buna səbəb parlamentin dövlət büdcəsinin layihəsini təsdiqləyə bilməməsidir.

Məqalədə bildirilir ki, bir qədər əvvəl ölkənin Müdafiə Nazirliyi qanunverici orqana hərbi büdcənin ümumdaxili məhsulun 1,40 faizini təşkil etməsi barədə müraciət edib. Lakin ümumdaxili məhsuldakı aşağı artım səviyyəsi bu hədəfin reallaşmasına imkan verməyib. Adı çəkilən ölkə hazırda müdafiə xərclərinə ayrılan vəsaitə görə NATO ölkələri arasında Lüksemburq və Belçika ilə birgə sonuncu yerləri bölüşdürür. Hazırda İspaniyanın Müdafiə Nazirliyinin alternativ maliyyə mənbələri axtarışında olduğu bildirilir.

Qeyd edək ki, bir müddət əvvəl NATO-nun baş katibi Yens Stoltenberq 2024-cü maliyyə ilində alyansın ümumi müdafiə xərclərinin 380 milyard dollar olacağını açıqlayıb. Bu isə Avrozonanın quruma üzv dövlətlərinin ümumdaxili məhsul səviyyəsinin 2 faizini təşkil edir.

Fərid Azəri