Azərbaycan Basketbol Federasiyasının rəsmisi: Hədəfimiz olimpiadaya lisenziya qazanmaqdır

Hədəfimiz Honkonqda keçiriləcək təsnifat turnirində uğurlu çıxış edərək, Paris-2024 Yay Olimpiya Oyunlarına lisenziya qazanmaqdır.

Bunu “Birxeber.Az”a açıqlamasında Azərbaycan Basketbol Federasiyasının (ABF) baş katibi Vüqar Əzimov 3x3 qadın millisi ilə bağlı danışarkən deyib.

Federasiya rəsmisi komandanın Fransanın Tuluza şəhərində keçirilən hazırlıq turnirindəki çıxışına da münasibət bildirib. O, millinin 1/4 finalda mübarizəni dayandırmasına görə məyus olmadıqlarını söyləyib: “Fransadakı turnir gözlədiyimiz səviyyədə keçdi. Orada yüksək yer tutmaq bizim üçün önəmli deyildi. Sadəcə, hazırlıq xarakterli yarış oldu. Fikrimcə, pis alınmadı. Nəzərə alaq ki, bu, 2024-cü ildə qatıldığımız ilk turnir idi. Qızların çıxışına mənfi rəy verə bilmərəm. Yarışlarda iştirak etdikcə komanda formaya düşür, basketbolçular arasında anlaşma güclənir. Qızlar getdikcə oyunlarını daha yüksək səviyyəyə çatdırırlar”.

Vüqar Əzimov qadın basketbolçuların daha iki turnirə qatılacaqlarını vurğulayıb: “Fransadakı yarış sonuncu təsnifat turniri deyil. Tailandda da iki turnirə qatılacağıq. Ondan sonra komanda Honkonqa gedəcək. Tailanddakı yarışlarda daha uğurlu nəticə gözləyirik. Hər şey hazırlıq durumunu yaxşı səviyyəyə çatdırıb, təsnifat turnirində ən gözəl performansı göstərməyə hesablanıb”.

Qeyd edək ki, Honkonqdakı təsnifat turniri aprelin 12-14-də baş tutacaq. Azərbaycan millisi Niderland, Monqolustan və Çili yığmaları ilə üz-üzə gələcək.