Valideyn himayəsindən məhrum uşaqların dövlət hesabına təhsili ilə bağlı yaş həddinin ləğvi təklif olunur

Şəhid ailələrinin üzvləri və valideyn himayəsindən məhrum olmuş uşaqlar üçün dövlət hesabına təhsilalma ilə bağlı tətbiq edilən yaş məhdudiyyətinin aradan qaldırılması təklif edilib.

“Birxeber.Az” xəbər verir ki, bu barədə Milli Məclisin Əmək və sosial siyasət komitəsinin sədri Musa Quliyev parlamentin bugünkü plenar iclasında çıxış edib.

“Çox yaxşı haldır ki, müharibə veteranı olmuş şəxslərə bununla bağlı heç bir yaş məhdudiyyəti yoxdur, istər 30 yaşında universitetə girsinlər, dövlət onların təminatını verəcək”, - deyə deputat bildirib.

Onun sözlərinə görə, şəhid ailəsi üzvləri və valideyn himayəsindən məhrum olmuş uşaqların təhsilinə dövlət dəstəyinin son yaş həddi 23-dür: “Təklif edirəm ki, bu məhdudiyyət aradan qaldırılsın. Bu kateqoriyadan olan şəxslər istənilən yaşda təhsil ala bilməlidirlər”.